سمعت لي كلمة مدري وش اقصاها
حزت بصدري وانا ماني بهارجها
لو كل كلمة اليا جتنا طردناها
بعنا الثمينه بسعر ما يخارجها
ومن يم هذا لهذا ما نقلناها
والناس واجد وتلقى من يروجها
من جابها بين خلق الله ووداها
لو به مراجل ترا نفسه يسمجها
من عامل الناس في سابق خطاياها
يقعد بدار خلا ما داج دايجها
في كنة تشوي الجربوع رمضاها
تيبس غصون الشجر من حر واهجها
والناس بالحق حكم الشيخ ما ارضاها
ما ترضى الناس لو انك تحججها
ياللي تبي الطيبه خذها وعطناها
وخل الطريفه طريه لا تثلجها
وأقضب طريق الاوادم وامش ممشاها
واتبع دروب العرب وادرج مدارجها
وارسم لنفسك حدود لا تعداها
من حط نفسه بدرب الضيق يحرجها
وان كان نفسك هواها قام ينحاها
حط الاعنه بروس الخيل واسرجها
وفكر بمنكافها قدام مغزاها
واضرب حساباتها وتشوف ناتجها
وكل بعضده يموح الدلو برشاها
وتلقى كبود الضوامي من يبهجها
وان صدت الناس عنا ما اعترضناها
ما تقفي الناس عنا ونتولجها
وان جاتنا الطيبه بالطيب زدناها
الطيبه بالعسل والسمن نمزجها
وان جاتنا الثانيه نصبر ونرفاها
يمكن اليا فاق راعيها يعالجها
وان عادها عودتن ماعاد ينساها
من حربتن في صميم الصدر نولجها
مسمومتن يبلش الدكتور بدواها
مايقنع الخبل لين انه يلامجها
ليست هناك تعليقات:
إرسال تعليق